Source:Miles Gloriosus 5.1
From TTT
- Periplectomenus
- Ducite istum; si non sequitur, rapite sublimen foras,
- facite inter terram atque caelum ut sit 〈 situs 〉, discindite.
- Pyrgopolinices
- Obsecro hercle, Periplectomene, te.
- Periplectomenus
- Nequiquam hercle obsecras.
- Vide ut istic tibi sit acutus, Cario, culter probe.
- Cario
- [5] Quin iamdudum gestit moecho hoc abdomen adimere.
- ut ea iam* quasi puero in collo pendeant crepundia.
- Pyrgopolinices
- Perii.
- Periplectomenus
- Haud etiam, numero hoc dicis.
- Cario
- Iamne in hominem involo?
- Periplectomenus
- Immo etiam prius verberetur fustibus.
- Cario
- Multum quidem.
- Periplectomenus
- Cur es ausus subigitare alienam uxorem, impudens?
- Pyrgopolinices
- [10] Ita me di ament, ultro ventumst ad me.
- Periplectomenus
- Mentitur, feri.
- Pyrgopolinices
- Mane, dum narro.
- Periplectomenus
- Quid cessatis?
- Pyrgopolinices
- Non licet mihi dicere?
- Periplectomenus
- Dic.
- Pyrgopolinices
- Oratus sum, ad eam ut irem.
- Periplectomenus
- Quor ire ausu's? em tibi.
- Pyrgopolinices
- Oiei, satis sum verberatus. Obsecro.
- Cario
- Quam mox seco?
- Periplectomenus
- [15] Ubi lubet: dispennite hominem divorsum et distendite.
- Pyrgopolinices
- Obsecro hercle te, ut mea verba audias, prius quam secat.
- Periplectomenus
- Loquere.
- Pyrgopolinices
- Non volui nec factum est*: viduam hercle esse censui,
- itaque ancilla, conciliatrix quae erat, dicebat mihi.
- Periplectomenus
- Iura te non nociturum* esse homini de hac re nemini,
- [20] quod tu hodie hic* verberatu's aut quod verberabere,
- si te salvom hinc amittemus Venerium nepotulum.
- Pyrgopolinices
- Iuro per Iovem et Mavortem, me nociturum nemini,
- quod ego hic hodie vapularim, iureque id factum arbitror;
- et si intestatus non abeo hinc, bene agitur pro noxia.
- Periplectomenus
- [25] Quid si id non faxis?
- Pyrgopolinices
- Ut vivam semper intestabilis.
- Cario
- Verberetur etiam, postibi amittendum censeo.
- Pyrgopolinices
- Di tibi bene faciant semper, quom advocatus mihi venis*.
- Cario
- Ergo des minam auri nobis.
- Pyrgopolinices
- Quam ob rem?
- Cario
- Salvis testibus
- ut te hodie hinc amittamus Venerium nepotulum;
- [30] Aliter hinc non ibis, ne sis frustra.
- Pyrgopolinices
- Dabitur.
- Cario
- Magis sapis.
- De tunica et chlamyde et machaera ne quid speres, non feres.
- Cario*
- Verberon etiam, an iam mittis?
- Pyrgopolinices
- Mitis sum equidem fustibus.
- Opsecro vos.
- Periplectomenus
- Solvite istunc.
- Pyrgopolinices
- Gratiam habeo tibi.
- Periplectomenus
- Si posthac prehendero ego te* hic, carebis testibus.
- Pyrgopolinices
- [35] Causam haud dico.
- Periplectomenus
- Eamus intro, Cario.
- Pyrgopolinices
- Servos meos
- eccos video. Philocomasium iam profecta est*? dic mihi.
- Sceledrus
- Iam dudum.
- Pyrgopolinices
- Ei mihi.
- Sceledrus
- Magis dicas, si scias quod ego scio.
- Nam ille qui lanam ob oculum habebat 〈 laevom 〉, nauta non erat.
- Pyrgopolinices
- Quis erat igitur?
- Sceledrus
- Philocomasio amator.
- Pyrgopolinices
- Qui tu scis?
- Sceledrus
- Scio.
- [40] Nam postquam porta exierunt, nil cessarunt ilico
- osculari atque amplexari inter se.
- Pyrgopolinices
- Vae misero mihi,
- verba mihi data esse video. Scelus viri Palaestrio,
- is me in hanc inlexit fraudem. * Iure factum iudico;
- si sic aliis moechis fiat, minus hic moechorum siet,
- [45] magis metuant, minus has res studeant. * Eamus ad me. Plaudite.
